NGAWN PULE PATEI PIANPIH HASIAL DAN
𝐍𝐆𝐀𝐖𝐍 𝐂𝐇𝐈𝐍 𝐍𝐔𝐍𝐏𝐇𝐔𝐍𝐆 𝐇𝐀𝐒𝐈𝐀𝐋 𝐃𝐀𝐍
^^^^^^^^^^^^^^^^^^^^^^
Ngawn pulepa te cu, Cong lelam in nunkhua asa mite haw hi.
Kumsial danle-Hasial dan cu,
Ha13 asial hawten Kum1 tin sialhaw hi.
Phiangkum cu Kum3 veikhat ah phiangkum tin namang haw hi.
✍️1.Canghak ha.
2.Vulcio.
3.Vulpi.
4.Kaau ha.
5.Tuun ha.
6.Tim ha.
7.Mang ha.
8.Cun ha.
9.Tang ha.
10.Dawnsawm ha.
11.Ngam ha.
12.Zankuah ha.
13.Insak halui ha.
✍️Atheingawl tei ca.
Dawngsawm niten ason nuam teica
Ngawn Chin Nipi Pikhat Ni Sial
Ngawn Chin pu le pa ten Ha Sial,Ni Sial cu pha no nei haw hi.
Chin daynasty sung um laih in le Khul/ Sinhuang a um haw laih in, ni sail, ha sial nei zo haw tin ngaisung theih mi na hi.
Chin dui lam, le Kabaw Kalay le Sihawng lam a um haw laih in ni sial, ha sial nei zo haw hi, tin ngaih sung theih mi na hi.
Mah hun laih ni sial, ha sial sam daan cu thei ciang ngai um bel tuk ma toh ti en, sual ngawl thei men hi.
Pu le Pa Ten,
Ni le ha sial cu hi tin sial haw: –
Hade zo in ni le ha sial in tiamteh haw hi. Hade a de bek ten hade ni khat, hade ni nih, hade ni thum tin hade liik tian sial ngut haw hi.
Hade liik ten, ha liik tin sam haw hi.
Hade liik ceng bek ten, hakiam nikhat, hakiam ni nih, hakiam ni thum,tin?hathim tian sial ngut leleu haw hi. Mah hade liik veikhat le hathim veikhat ceng cu, ha khat tin na sam haw hi.
Mah hakhat sung ah nipi pi li um hi.A can khat no ah pi thum le ni nga te vang na um thei bok hi. Itahum titale, hade a de le hakiam zo in ni ha a sial haw hang na hi.
Chin hills mual hum ah cong le Laam-
Mual hum ah pu le pa te cong le laam in a um haw ten nipi pikhat sung ni sial daan cu bawl haw hi.
A muh tei Con dann tuah zui in,
Kekta mat ni -Sun
Kem dawh ni -Mon
Aihpi ni – Tue
Sungta hawh ni – Wed
Sasuat ni – Thu.
Tual phiah ni – Fri
zan ani -Sat~tin pi khat sung ni sial nei haw hi.
Mah ten “Kum kheen, khua ni” nei haw aa, kum kheen tih cu kumbo, new year khia son hi. Kum kheen khi Khuani tin sam bok haw hi.
Kum lu, Cunghum, Diim le Thaang ah, sial tuah a biak haw laih in hade zo in a biak haw tak Kekta mat ni doh ngeh tuah si dun leleng tik haw hi. A tu hun nipi ni a tih mi ni khat khi bel tuk tin ngai sung theih hi.
Mah hun laih ah Mikang awn um laih ngawl tak tu a Mikang awn in, Sun, Mon tin ngat cu theih baih nak in ngat mi poh hi.
Tapidaw, Christian Biak Nak le :-
Christian, biak nak a hen ten,Bible sung ah Pathian in niluk sung na dek in ni salih ni cu cawl um hi, tin Bible Pianpat nak thu hilh zui in Pathian in nikhat ni, lei le van bawl, ni nih ni ni nga ni, ni no ni bawl, nipi ni cawl um” hi tin cung in zui in nipi pikhat sung ni sial in mang in, nei haw ta hi.Tu laih nai ah, no ni khi ni luk ni tih vang in sam bok haw hi.,
Kekta mat ni –
Nipi ni -Sun.. ni khi Pau Tin Hau biak nak ten “Buzung ni ” tin sam haw hi.Buzung ni cu Phazaa-inn ah khawm haw hi.
Cuzah Tawng Heng Ten:-
Mual hum ah Mikang in uk in, lai te bawl sak in le luatlatzi ngah ceng ten phunli tawng te nei in tawng kai haw hi. Tawng ah Lai Lai tin cung tik haw in, mai awn aw suah tuah tek no mang in lai cang kom in ngan haw hi. Mah phunli cuzah tawng saya ten tawng inn sung ah Phalam awn tuah awn tik haw hi.Tawng saya dek ten Lai/ Phalam awn in ” tlawng kai ni khat ” ,tlawng kai ni hnih tlawng kai ni thum, tlawng kai ni li,.tlawng kai ni nga, zarh te”” tin hilh haw hi. Oh Ngawn ten ” tl..” awsuah le ” hn..” awsuah a neih uh ngawl tak cu, Phalam awn cung in ” tawng kai nikhat, tawng kai ni nih……tawng kai ni thum ni,tawng kai ni li ni, tawng kai ni nga ni, ni luk ni, ….tin cung vawk haw hi.Mah ten Phalam tei ” zarh khat” tih khi oh Ngawn ten “r” aw suah um ngawl tak cu zalh khat tin cung bok haw hi. Mitei r aw man nak “L” aw in mang haw hi. Ngawn awn cun “nipi khat” tin sam haw hi.Nipi khat tih cu nikhat ni pen nipi ni tian khi nipi khat tin sam haw hi.Mah sung ah oh Ngawn ten Nino ni le Nipi ni cu sam nak a tuam in nei haw hi.
Hi lai hi keimah pakhat hi muh daan le theih daan le research daan na hi poh hi. Maan bel le pha bel tih nak kha MA hi.
Saya Mang~
5.12.2017.
𝐍𝐆𝐀𝐖𝐍 𝐂𝐇𝐈𝐍 𝐇𝐈𝐒𝐓𝐎𝐑𝐘 