VAPUAL TANGTHU

Nidang laih cawng in inn kua khat um haw hi. Nikhat ni ah in, inn tek nu in thihsan in, paca pathum no bek um haw hi. A pa cu zihuai leh hi. A pai zihuai leh mi, anusel haw cu zimasa ca,unau panih tei lakpen cul hak sa zetin huatna zet in um hi. Nusel mitmai zo in nunkhuasa li haw hi. Azi in a pasal lak ah, nazi masa cano panih cu that in hi, mu nap mang zo ing, na that ma tale, nupa khek tuk hung hi, nangmah zansan in tai tatung hi tin, tili tili hi.

A pasal vang cun, a zi tai tuk le lau sih, a cano te mai sung suak that tuk le ngam ma, nuam ma, thin kham in um hi. A thah ngam ngawl tak cu a pa in, a cano tei lak ah thingcom nung tin ti in, paca hawng in ngam sung hampalak ah thingcom hawh pih hi. Cano te aw, hi lai tawk hi thei laih uh cim? tin dong hi. A cano ten, thei laih ung hi, ka thingcom nak uh, ka sial khal nak uh, tin don haw hi. A pa cun zinsang hih ta nang tin a cano te cu zol in, inn ah pin kuh den hi. A cano te vang cu, thing khop-uk pua in inn ah pin haw hi.Inn a hen haw ten, a nusel haw cun, paak hem diak in paak het hem hi. Mah ticun, nisial in a paca thum haw in, ngam sung ah thingcom hawh leleng haw hi. A pa’i tumtah ngai mi cu hampalak, ngam ngil sung ah a cano panih te zamsan in, tavang te pawpi ten man in ei haw leh tih mi tumtah nak nei in zam san nuam hi.
Nikhat ni ahcun, pa ca hawng in ngam sung tukhang sung ah thingcom hawh haw hi, ca no te aw hi lai tawk mun hi thei uh cim? tin dong hi, a cano ten thei ung hi, ka sial khalh nak uh hi tin don haw hi. A pa in eksang hih vut ta nang tin zol in, inn ah pin kuh den hi, a cano te cu zamsan ngangai ta hi.. A ca no te cu a pa zei in, pa aw, pa aw, tin au het in kap het in a pa cu zei haw hi. A cano tei au aw cu mualza liam thong ta hi.

Mah ticun, a pa zei in kap thah in, ilai mun ah heng ung kaw tih hei thei leh haw ma zo hi. A hawh lih nak el ah thingkung saang zet pakhat um hi. A u in a nau lak ah, nau aw hi thingkung humah kaito nang maw, inn lam pin nak lamzin zo nang maw, tin ti hi. A nau in aw tin ti hi.Thingkung sangpi hum cu kaito in thing hum a henten, Vapual bu mu hi. A u in, nau aw, la hah Vapual tui mu ing, atui um tin ti hi. A nau in U aw, kah khiak suk amaw, tin ti hi. A u in, nau aw, ka khiak suk ta, Vapual tui keh tuk si, tin ti hi. A u in, Vapual tui cu kamsung ah muam thah in tolh suk tung, tin a tih ten, a nau in, u aw, hem lolh nai pah su maw, tin ti hi. A u cun hemlolh tuk mavang, tin ti in, Vapual tui muam thah in thingkung hum pen,tolhsuk in, a thanthep a henten, Vapual tui cu hem lolh nga ngai ta hi. Vapual tui a hem lolh hangin, a U cu Vapual in suak ta hi.Mah ticun, a u in, a nau lak ah, ka len nak ka ha nuai nilim sun zui in hi, hawh ngut in hi tin ti hi. A tih nak bang in, hawh ngut in, munpha le ngampha a hen ten, a u Vapual cu cawl in, mah lai mun ahcun, a nau cu aidamsat in khuato in um ta hi.

Mah mun ah cun a nau cu zi le ca nei in, hausa in cangbem ngangel tung in, sial te vok te akte khuite ngul in pung in, hausa zet in um ta hi. A khua toh nak cu a pa’i um nak khua zawn tawk ciah tak cu, a sial ek luang mi cu a pa tei inn tian ah luang suk hi. A pa haw in, hi ti tak a sial ek luang tam cu a kua tei sial nem tim tin, sial ek luang nak cu zui in, a zoh kuh ten a cano tei inn in cang ta hi.

A nau cu hausa zet in, a hauh zet tak cu Cong le Laam tuk in um hi. A con le lam nak ah, Kawl a, a U sam tuk in Vano phun kim sam in cial hi. Vano phun kim sung pen, a masabel in, Baibek’ tik hi. Baibek nang Kawl a ka u itin sam tuk kam a tih ten, baibek in ‘bai-be lawk- bai-be-lawk’ tin sam tung a tih tak cu, sawn vawk in tingnah tui sung ah a hol lam cu in, baibek cu tuni tian a hol san ta hi. A panih nak cu, Va ak sam in, Va ak nang Kawl a ka u, itin sam tuk kam?a tih ten, Va ak in, ‘ak- ak -ak-‘ tin sam tung a tih tak cu, sawn vawk in tingnah tui sung ah cak in, va ak cu pumpi cing in hang khawng ta hi.

A pathum nak cu Vahoi sam in, vahoi nang Kawl a ka u itin sam tuk kam? tin a tih ten, Vahoi in, ” Ka nau in khuang a cawi e… Kawi a ka u pin..aw e..hoi..hoi…hoi..,” tin sam tung ti hi. A nau in a con le laam nak ah, Kawl a, a u sam tuk in tik hi. Vahoi cu Kawl a, a u sam tuk in leng ngut hi, Vahoi hi sam aw a zak bek ten, Vapual vang cu a nau khuangcawi nak con le laam nak ahcun, leng ngut in hung hi. A u Vapual a hen ten, a nau cu cong le laam in, Khuangcawi ta hi.

A nau pa’i con le laam khuangcawi nak ah, Vapual cu kekta lam pawl tei hum ah, a ha phalh in lamsa in, lamsum in, heh tin lam hek bok hi. A nau in, U aw, u aw, na nge(ngia) pa khat no kah khiak kek a tih ten, Vapual in a nge phabel pakhat cu khiak suk hi. A u hi nge cu a khuangcawi lam nak ah cun acal ah tuan ta hi. A pa le a nusel vang cu khuangcawi lam nak ah hung bok haw in, a cano (anau) tih dan cung in, capa aw na nge(ngia) a pha bel pakhat no khiak bok in, tin a tih haw ten, a capa vapual in, kamkaa in mitsing dingdeng umaw, tin ti hi, a tih nak bang in a pa le a nusel cu kamkaa in mitsing dingdeng a um haw laih tak in , vapual cun vonsawk ek san suk in zam ta hi.
Anau, khuangcawi tu pa cu Ngawn in cang ta hi. A u Vapual cu Kawl in cang ta hi tin, Ngawn Chin le Vapual tin, tangthu nguipi in um ta hi, Ngawn pu le pa tei son mi tangthu na hi.

Note: Copyright ngawl in Share sak un hi.

crd